xg030300

Sesión de Xunta de Goberno do 3/3/2000.

INQUÉRITOS DO REPRESENTANTE DA FETE/UGT-UVIGO.

Sr. Rector, permítame que lle formule unha cuestión que atinxe á política sobre as materias de libre elección, que agardo resulte da súa atención e deste órgano colexiado de goberno ordinario da Universidade. A este efecto, pídolle que xunte o presente texto na súa integridade á Acta da Sesión.

As materias de libre elección están reguladas por normas de ámbito estatal e pola Normativa da UVIGO sobre Estructura e Organización Académica de Plans de Estudios, en orde a flexible configuración polo estudiante do seu curriculum, que establecen que o seu número de créditos non pode ser inferior ó 10% da carga lectiva total: Lembro este concepto, para situarme precisamente no eixo da cuestión, que radica na condición de que estas materias constitúen unha parte moi importante da oferta académica anual da Universidade e do curriculum das/os estudiantes. En definitiva, constitúen un factor de calidade e competitividade. De aí, que nas Directrices propias da Universidade de Vigo se recoñeza respecto das materias de libre elección o seguinte:

É unha opinión xeralizada que se fai necesario afondar nos seus aspectos positivos.

Deberíase avanzar moito máis na definición e ordenación destas materias.

Deben servir para ofrecer unha formación complementaria e interdisciplinar.

Deberan de contribuir a unha máis libre configuración dos: itinerarios curriculares, académicos ou profesionalizadores.

Serviren para facilita-la mobilidade entre títulos a través das pasarelas.

Sr. Rector, se esto é así, pasemos dos ditos ós feitos, dos principios á realidade, da norma ó seu cumprimento efectivo. Neste senso, antes de facer propostas concretas, permítame que sinale algúns incumprimentos graves dos propios principios que inspiran a normativa vixente, aprobada tardíamente na sesión de Xunta de Goberno coa data 13/09/1999. Destaco os casos seguintes:

O profesor Candelas Colodrón denunciou (27/01/2000), mediante correo electrónico á comunidade, que na Academia ICA se viñan impartindo cursos extraacadémicos convalidables por créditos de libre elección. Fai uns días, apareceu empapelada a Facultade de Económicas / Empresariais coa oferta desta Academia, coincidindo co comezo do segundo cuadrimestre. Nesta propaganda aparece na portada da publicidade de ICA o escudo da Universidade e na primeira fila do texto interior anunciase cunha banda publicitaria: CONVENIO DE COLABORACIÓN ENTRE O CENTRO DE FORMACIÓN ICA E A UNIVERSIDADE DE VIGO PARA O RECOÑECEMENTO DE CURSOS, SEMINARIOS E ACTIVIDADES ACADÉMICAS PARA A LIBRE CONFIGURACIÓN (DATA DE 20 DE OUTUBRO DE 1999), e seguidamente díse en letra miúda, pero ben visible: Con data do 20 de outubro de 1999 fíxose un CONVENIO entre o Centro de Formación ICA e a Universidade de Vigo. Mediante dito Convenio algúns dos Cursos realizados no Centro considéranse válidos como créditos para a libre configuración dos alumnos da Universidade de Vigo.

Sr. Rector, non sei se esta actuación está encadrada na Universidade de todos, expresión coa que vostede rotula os artigos que asina na prensa local. Tampouco sei se esto forma parte do resultado, que ten dado como un dos seus logros fulminantes, de abri-la Universidade á Sociedade. En calquera caso, pola miña parte só vexo que de novo os intereses privados e particulares quédasen cos públicos dunha Institución que, por lei, ten que aterse ás normas do ordenamento xurídico público e servir ós intereses xerais da sociedade á que se debe.

Sr. Rector, esto acontécelle, salvo mellor criterio, a que vostede segue asinando CONVENIOS pola súa conta, incumprimindo as normas estatutarias que lle obrigan a somete-lo texto dos mesmos á consideración e aprobación previa da Xunta de Goberno.

Polo devandito, requírolle:

Que me remita o expediente completo deste Convenio ós Locais Sindicais da sección que represento neste órgano de goberno.
Que proceda á denuncia inmediata do Convenio. Ademais, no punto 25 da Normativa sobre materias de libre elección, aprobada pola Xunta de Goberno coa data do 10/2/2000, establécese que a este obxecto só se poderán asinar convenios con entidades sen ánimo de lucro, non sendo este o caso.
Que asuma as responsabilidades políticas como Rector que notoriamente se derivan da sinatura, pola súa conta, dun Convenio destas características, coa agravante de que este feito non é o primeiro.
Que faga depuración de reponsabilidades fronte á persoa/oas do seu equipo de goberno que estean metidas nesta iniciativa.

Outro caso, que someto á consideración deste órgano de goberno, é o da oferta de Aulas de Extensión Universitaria (1999/2000. 2º Cuadrimestre) do Vicerrectorado deste nome, que outorga tamén créditos de libre elección polas mesmas, acolléndose o punto 2. 7. -3 da normativa da UVIGO e para aquelas titulacións que así o contemplen no seu Plan de Estudios. A este respecto digo que, de acordo con todolo antedito, esta vía tampouco é boa e pido que se peche polas consideracións seguintes:

Desvaloriza a oferta académica das materias de libre elección.
Despois farase o mesmo nos cursos de verán, xornadas e conferencias que se poidan organizar, que en moitos casos só teñen por obxectivo quedar ben con determinadas persoas amigas, coas que se conta para tribunais de teses ou oposicións.
A atribución de créditos é aleatoria e discriminatoria. Por exemplo, outórganse créditos por: iniciación á percusión, á batería moderna, ó piano moderno, ó canto, etc.; pero, ata a aprobación da última normativa (X.G. 10/2/2000) non se validaban créditos por ter aprobados cursos superiores completos das mesmas materias nos Conservatorios Superiores, sendo a gran maioría das/os matriculados estudiantes universitarios. En calquera caso, non se pode outorgar o mesmo nivel a efectos de validación a cursiños de suposta iniciación que a cursos enteiros oficiais.
A programación das actividades de extensión cultural, sexan dos Centros ou do Vicerrectorado correspondente, ten uns obxectivos que non son coincidentes cos das ensinanzas académicas e, sendo como son importantes, a súa oferta débese deseñar dende a demanda, sen necesidade de fideliza-los clientes co premio de créditos de libre elección. Consideradas, ademais, coma un servicio á comunidade universitaria teñen que ser gratuitas.

Polo devandito, paréceme excesiva a difusión desta convocatoria a toda páxina nos medios de comunicación, amosando o Director do seu Gabinete de Prensa, unha vez máis, moi pouca sensibilidade coa natureza das cousas desta Institución.

PROPOSTAS:

PRIMEIRA: Que se suprima da normativa vixente o punto 2. 7. -3: Tódolos Plans de Estudios preverán a posibilidade de conceder créditos de libre elección como recoñecemento de outras actividades. En consecuencia, que tal posibilidade non se contemple nos Plans que están pendentes de aprobación pola Xunta de Goberno.

SEGUNDA: Que se revise o punto 2. 7. -4 da devandita normativa, no senso de que poida haber oferta de materias de libre elección no primeiro curso académico de tódalas titulacións, tal como acontece no momento presente cun proveito importante para os estudiantes que entran por primeira vez na Universidade. Ademais, que se diferncie entre a natureza das materias de libre elección, según sexan do rpimeiro ou do segundo ciclo.

TERCEIRA: Tendo en conta que a formación de cidadanos está acreditada por Organizacións Internacionais (UNESCO), pola política universitaria da UE como un dos fins da Universidade e, coma tal, admitida pola CRUE, que se favoreza a introducción de materias de libre elección sobre temas como: Constitución Española, Integración Europea, Historia da Segunda Metade do Século XX, Linguas da UE e, en xeral, materias do eido das HUMANIDADES. Esta petición fundaméntase, por outra banda, no dato de que case a metade das/os estudiantes da Universidade de Vigo proceden dun COU de Ciencias.

CUARTA: Que, dende os Servicios de Alumnado e SIOPE (Servicio de Información, Orientación e Promoción ó Estudiante) se confeccione unha GUÍA DA OFERTA DE MATERIAS DE LIBRE ELECCIÓN, que se poida distribuir a comezos do mes de maio a tódolos centros de COU e se poña a disposición de tódolos estudiantes co material da matrícula no mes de xuño. Entre outras vantaxes desta Guía, está a de impedir que ocurran casos, como os que aconteceron no presente curso, de cambios dun cuadrimestre a outro, sen coñecemento das/os estudiantes matriculados, e facer en xeral compatible a súa elección cos horarios do resto das materias. VIGO, 3 de marzo do 2000.

J. J. SANTAMARÍA CONDE.